Aha Kissinger yari i Beijing mu 2019
Prezida w’Ubushinwa Xi Jinping yabonanye n’uwahoze ari umu diplomate wo mu rwego rwo hejuru Henry Kissinger, mu gihe Reta zunze Ubumwe za Amerika zibandanya gusukamwo mabisi mu migenderanire bafitaniye n’Ubushinwa.
Urugendo rwa Kissinger rutunguranye ku mugwa mukuru w’Ubushinwa rubaye mu gihe hari ingendo z’urutavanako z’abategetsi ba Amerika muri ico gihugu.
Uwo yahoze ari umunyamabanga wa reta ubu afise imyaka 100, yaragize uruhara runini mu gufasha Ubushinwa kuva mu kato bwarimwo mu myaka ya 1970.
Amerika yavuze ko yagize urwo rugendo nk’umunyamerika ku gatwe kiwe.
Ariko uravye igihagararo ciwe mu Bushinwa, asa n’uko ariko arakora nk’inzira y’ibiganiro hagati ya Amerika n’Ubushinwa, nk’uko bishikirizwa n’abahinga.
Kissinger yakiriwe na Xi mu nzu yakira ingenzi ya Diaoyutai, ikibanza c’ibanga gusumba ‘Grand Palais du Peuple’ hasanzwe habera imibonano n’abadiplomate b’ibindi bihugu.
Mw’itangazo rito ryasomwe nta do n’ido ryatanze kuri uwo mubonano, ariko rivuga Kissinger nk’umu “diplomate rurangiranwa”, rinashimangira uruhara rwiwe mu kunagura imigenderanire ya Amerika n’Ubushinwa muri kahise.
Kissinger, yageze muri ico gihugu ku musi wa mbere, yarabonanye kandi n’umu diplomate Wang Yi n’umushikiranganji wo kwivuna abansi Li Shangfu – yafatiwe ibihano na Amerika – muri iyi ndwi.
Amatangazo y’Ubushinwa kuri iyo mibonano aroroheje cane, aho Wang na Li bavuga ko hakenewe ukwubahana, ugufashanya no “kugiriranira umubano mu mahoro” hagati y’ivyo bihugu vya rutura bibiri.
Inyandiko kandi isubiramwo Kissenger avuga ko “yari umugenzi w’Ubushinwa” kandi ko “yaba Amerika canke Ubushinwa ata n’umwe yokura inyungu mu guhangana nk’abansi”.
Ntibizwi uruhara reta ya Amerika yagize muri urwo rugendo rwa Kissinger. Mu ntango y’iyi ndwi, umuvugizi w’ubushikiranganji bw’imigenderanire yavuze ko bari bazi ivyerekeye urwo rugendo, kandi ko n’abategetsi b’Ubushinwa bari barumenyesheje umushikiranganji w’imigenderanire Antony Blinken igihe yagendera ico gihugu mu kwezi kwa gatandatu.
Uretse Blinken, Kissinger ni we mutegetsi wo mu rwego rwo hejuru wa Amerika yakiriwe na prezida Xi muri izi ndwi nke ziheze – urugero rw’icubahiro uwo yahoze ari umudiplomate yubashwe mu Bushinwa.
Umunyamabanga wa reta ajejwe ubutunzi Janet Yellen n’intumwa idasanzwe ya Amerika mu vy’ihindagurika ry’ikirere, John Kerry, nabo baragendeye Ubushinwa, ariko ntibabonanye na prezida w’Ubushinwa.
N’aho Kissinger atavugwako rumwe mu bindi bice vya Asia ku ruhara yagize mu ntambara yo muri Vietnam, mu Bushinwa aguma abonwa nk’uwafashije ico gihugu mu kukivana mu kato.
Mu 1971, igihe Amerika n’Ubushinwa butari bufitaniye imigenderanire izwi, Kissinger yaragize urugendo mw’ibanga mu Bushinwa rwo gutegura urugendo rw’uwari prezida wa Amerika ico gihe, Nixon.
Mu mwaka wakurikiye, Nixon yarakandagije ikirenge ku butaka bw’Ubushinwa, arahura n’abategetsi bakuru harimwo na Mao Zedong. Vyaciye inzira yo gusubiza itoto imigenderanire ya Amerika n’Ubushinwa no gufasha ico gihugu kugirana imigenderanire n’isi yose.
Kuva ico gihe, Kissinger yakiriwe mu Bushinwa incuro zirenga 100, nk’uko inyandiko yo kuri uyu wa kane ibivuga.
