Umushikiranganji wa Ukraine ajejwe kwivuna abansi avuga ko imyimenyerezo yo gukoresha ibirwanisho bishasha vy’Uburengero itangura kuri uno wa mbre
Na Alys Davies na Joshua Cheetham
Uwahoze ari umushikiranganji wo kwivuna abansi wa Ukraine avuga ko iki gihugu kiriko kiritegurira igitero gishasha c’Uburusiya muri kuno kwezi.
Mu kiganiro yagiranye n’abamenyeshamakuru, Oleksiy Reznikov yavuze ko gushika ico gihe ibirwanisho vyemewe n’Uburengero bizoba bitarashika, ariko ko Ukraine ifise ibirwanisho vy’integabizoza bikwiye kugira ngo ihangane n’Uburusiya.
Perezida Volodymyr Zelensky avuga ko ingabo ziwe ziri mu ntambara z’urutavanako muri Bakhmut, Vuhledar na Lyman, aha ni mu buseruko bwa Ukraine.
Reznikov yashikirije aya majambo hasigaye amasaha make imbere y’uko bitangazwa ko yategerezwa gusubirizwa nk’umushikiranganji wo kwivna abansi.
Umukuru w’igendereza rya gisirikare Kyrylo Budanov ni we azomusubirira, nk’uko bivugwa n’umutegetsi wo mu mugambwe wa Zelensky.
Iri subirizwa rije mu gihe ubu bushikiranganji bwiziziwe na ruswa.
Reznikov arahakana amakuru avuga ko bamwe mu bategetsi bo mu bushikiranganji bwo kwivuna abansi banyuruza amatungo y’igihugu mu bijanye n’amasoko y’imfungurwa z’abasirikare.
Umushingamateka wa Ukraine David Arakhamia yatangaje iri subiramwo rya reta ku wa Mungu, aho yavuga ko “intambara ni yo igenga poritike y’abakozi”.
Reznikov, umuntu amenyerewe cane mu twigoro twa Ukraine two kurondera imfashanyo z’ibirwanisho mu bihugu vy’uburengero, agiye kuba umushikiranganji w’amahinguriro makuru makuru.
Perezia Zelensky aramaze kubogoza abategetsi batari bake bo hejuru mu twigoro two kurwanya igiturire muri reta yiwe.
Mu kiganiro c’imbere y’aha n’abamenyeshamakuru, Reznikov yari yavuze ko Uburusiya butaribwo bwegeranye uburyo bwose bwo gukora igitero, ariko ko bushobora kugikora uko nyene nk’ikimenyetso co kwibuka umwaka uheze igitero ca Moscou gitanguye ku mugaragaro ku wa 24 Ruhuhuma (2).
Yavuze ko vyitezwe ko Uburusiya buzoshira imbere kwigarurira akarere kose ka Donbas kari mu buseruko hamwe no gutegura ibitero mu buseruko bwa Ukraine.
Umushikiranganji wo kwivuna abansi yaremeje kandi ko kuva kuri uno wa mbere ingabo zigiye gutangura imyimenyerezo yo gukoresha vya bimodoka ntamenwa vy’Ubudagi, Leopard.
Reznikov avuga ko Ukraine yamaze kuronka ibisasu vya misire biraswa kure, gushika ku birometero 150, ariko ko bitazokoreshwa mu gutera ku butaka bw’Uburusiya – ko bizokoreshwa gusa mu gutera uturere twa Ukraine twigaruriwe n’Uburusiya.
“Ndazi neza ko tuzotsinda iyi ntambara”, niko Reznikov avuga, ariko akavuga kandi ko mu gihe batoronka indege z’intambara z’Uburengero, “izodutwara ubuzima bw’abantu benshi”.
N’aho Uburengero bwahaye Ukraine ibirwanisho, Uburusiya bwarateye intambwe mu micungararo ya Bakhmut muri ino misi iheze, mu gihe bubandanya burungika izindi ngabo nyinshi ku rubuga rw’intambara.
Umurwi w’abacangero b’Abarusiya Wagner ni wo warwanye cane muri aka karere.
Umukuru wawo, Yevgeny Prigozhin, avuga ko intambara zikomeye cane mu turere tumwe tumwe tw’iki gisagara, ingabo za Ukraine zikaba zirwana gushika ku ka nyuma.
Ingabo z’Uburusiya zimaze amezi atari make zigerageza kwigarurira Bakhmut – intambara yaho ikaba ari yo ya mbere imaze igihe kirekire kuva Uburusiya butanguye igitero kuri Ukraine haraciye hafi umwaka.
Kwigarurira aka karere ni ikintu kirumara cane mu twigoro tw’Uburusiya two kwigarurira akarere kose ka Donbas.
Coba kandi ari ikintu gikomeye cane ku Burusiya inyuma y’aho butakarije mu mezi aheze uturere tumwe tumwe bwari bwigaruriye.
Mw’ijambo yama ashikiriza buri joro, Zelensky avuga ati: “Ibintu ntivyoroshe mu ntara ya Donetsk – intambara zikomeye”. Ariko yongerako ati: “Nta yindi nzira dufise atari ukwivuna no gutsinda”.
Ubushikiranganji bw’Ubwongereza bujejwe kwivuna abansi buvuga ko ingabo za Ukraine muri Bakhmut zibandanya zigaranwa mu gihe iz’Uburusiya zibandanya zitera intambwe ntonto mu twigoro twazo two kugerageza kugota iki gisagara.
Bwongerako ko ibintu bisa n’ibitagiye kworoha ku mabarabara abiri nyamukuru muri Bakhmut.
