Ahavuye isanamu, Presidence RDC
Mu rugendo arimwo muri Republika ya Demokrasi ya Congo, umwungere wa Ekleziya Gatolika, Papa Francis, yagirije ibihugu bikize gusahura Congo bimwe vy’ikirenga ntiyabasha kwungukira mu mutungo yifite.
Papa ari mu rugendo rwiwe rwa mbere muri Congo yagirije ivyo bihugu kwugara amaso bikirengagiza umubabaro w’ikirenga iki gihugu kirimwo.
Papa yagize ati: “Kura amaboko yanyu muri Congo, kura amaboko yanyu muri Afrika. Iki gihugu, ahanini casahuwe, ntigishoboye gukoresha umutungo waco mwinshi cane: dushitse mu gihe kitumvikana aho ivyamwa vy’ubutaka bwaco bugituma kiba “igihugu mvamahanga” ku banyagihugu baco.
“Uburozi bw’ugukunda amaronko bwasize amaraso diyama yaco. Aka ni akaga amakungu kenshi adashaka kubona, kwumva no kuvuga.
“Ariko iki gihugu n’uyu mugabane bikwiye kwubahwa no kwumvirizwa. Reka kuzibira Afrika: si ubutare bwo kwimba canke ubutaka bwo gusahura. Afrika yifatire mu minwe kazoza kayo”.
Papa Francis yashitse i Kinshasa mu burengero mu gihe ingwano z’intwazangabo za reta n’inyeshamba za M23 zariko zica ibintu i Masisi mu buseruko.
Inyuma yongeyeho ati: “Ntidushobora kubandanya tumenyereye iseseka ry’amaraso ryaranze Repubulika y’Intwaro Rusangi ya Congo mu myaka mirongo, igahitana imiriyoni z’abantu.
“Ibiganiro vy’amahoro, ari navyo ntera intege cane, bikeneye gushigikirwa n’ibikorwa biboneka, kandi n’ivyo abari muri vyo biyemeje bigakurikizwa
Ahavuye isanamu, Getty Images
Papa Francis ari mu rugendo rwiwe rwa mbere muri RDC yakiriwe na Prezida w’ico gihugu Felix Tshisekedi
Mu ntango Papa yari yateguye kugendera umuji wa Goma mu buseruko bw’igihugu, ariko urwo rugendo rwarasibijwe kubera impamvu z’umutekano.
Ahubwo, azohura n’abacitse kw’icumu ry’intambara zo muri ako gace ko mu buseruko gafise ubutunzi bwinshi bw’ubutare, aho imigwi ishika muri za mirongo imaze imyaka irenga mirongo ibiri isasika inganda.
Abanye-Congo benshi bizera yuko urugendo rw’umwungere wa Ekleziya Gatolika ruzozana ubutumwa bw’icizere runashobore kwongera ingoga abarongozi b’igihugu ngo barondere amahora aramye.
D. R. Congo ni co gihugu co muri Afrika kirangwamwo abagatolika benshi – aho bashika hafi mirongo itanu kw’ijana vy’abanyagihugu bose batuye ico gihugu.
Papa Francis azoca agendera Sudani y’epfo – ikindi gihugu kiri mu bibazo vy’umutekano – mu mpera z’ino ndwi
