Abakirisu bari mu marira igihe Papa yava mu bitaro
Papa Francis yavuze atwenza ati “ndacari muzima” igihe yava mu bitaro i Roma aho yari amaze imisi itatu.
Vaticano yari yamenyesheje ko yariko arafata imiti ya antibiotics kandi ko yari kurekurwa kuri uno wa gatandatu, bivanye n’ico ibipimo vyari kerekana.
“Nta bwoba nari mfise, ndacari muzima”, niko uno mu Papa w’imyaka 86 yabwiye abamenyeshamakuru n’abakirisu bari buzuye amosozi hanze y’ibitaro imbere y’uko yurira imodoka.
Yerekanywe amwenyura, aramutsa n’abantu ari mu modoka, imbere y’uko asohoka kugira abwire ijambo abari aho. Mu nyuma yaciye ajanwa i Vaticano.
Papa yijijwe ibitaro imbere y’indwi izoba irimwo ibikorwa vyinshi muri Liturujiya ya Katorika mw’ihimbazwa rya Pasika.
Indwi Nyeranda, nk’uko bayita, igizwe n’ibikorwa vyinshi n’imisa nyinshi, ibi bikaba bishobora gusaba inguvu nyinshi z’umubiri.
Ejo ku wa gatanu, umuvugizi wa Vaticano Matteo Bruni yavuze ko Papa atazoba ari mu gisabisho co guhimbaza umusi mukuru w’ibisandasanda ku wa Mungu.
Uyu mupapa akomoka muri Argentina, akaba ariko yegereza isabukuru y’imyaka cumi amaze arongoye Eklaziya Katorika muri kuno kwezi, mu buzima bwiwe yagiye ahura n’ibibazo bitari bike vy’amagara, harimwo no kubagwa agakurwamwo ihaha rimwe afise imyaka 21.
Mu mezi aheze, yaranamaze igihe agendera ku gakinga k’abamugaye kubera ingorane z’ivi ryiwe.
Ariko Papa yarabandanije ibikorwa vyiwe, mu kugendera Repubulika ya Demokrasi ya Congo hamwe na Sudani y’Epfo mu kwa kabiri. Mu kwezi kw’imbere y’aho, yararongoye ibirori vyo gushingura uwo yasubiriye, Papa Benedict XVI.
