Ahavuye isanamu, PRESIDENCE RDC/Twitter
Prezida wa DR Congo Félix Tshisekedi ubwo yashika i Bujumbura uyu munsi
Kuri uwu wa gatandatu, Uburundi bwakiriye inama idasanzwe igira 11 ihuza abakuru b’ibihugu n’ama reta, yihweza ishirwa mu ngiro ry’amasezerano y’amahoro, umutekano n’imigenderanire kuri Repubulika y’Intwaro Rusangi ya Congo no ku karere.
Abakuru b’ibihugu n’amareta 13 ari muri uwo mugambi, baganiriye ahanini ku kibazo cerekeye amahoro n’umutekano mu buseruko bwa DR Congo.
Umukuru w’igihugu c’Uburundi Evariste Ndayishimiye yaciye agenwa mu mabanga yo guhagararira uwo mugambi. Yasubiriye Félix Tshisekedi wa DR Congo yari amaze amezi 15 awuramutswa.
Mw’ijambo yashikirije, Prezida Tshisekedi, ata kurya umunwa, yavuze ko Urwanda ari rwo rutera umudugararo mu gihugu ciwe.
Yagize ati: “Urwanda ni rwo rwinyegeza inyuma y’umuhari w’iterabwoba M23 mu ntumbero yo guhungabanya umutekano mu buseruko bw’igihugu cacu.
“Ibi vyose rubikora kugira rushobore gucukura ubutunzi kama bwa Kongo”.
Ku bwa Tshisekedi, Urwanda ruhonyanga aya masezerano yaganiriweko kuri uwu wa gatandatu kandi “rwarayashizeko umukono”.
Yibukije ko ayo masezerano abuza ibihugu vyayemeje kwinjirira ibindi bihugu. Ngo aranabibuza gushigikira canke gufasha umurwi uwo ari wo wose uba ufise intumbero yo guhungabanya ikindi gihugu.
Uwaserukiye Urwanda, umushikiranganji wa mbere Édouard Ngirente, ntaco yashikirije. Ariko mu mezi aheze, Urwanda rwagiye rurahakana ivyo rwagirizwa n’indongozi za DR Congo.
Umukuru wa ONU António Guterres yongeye gusaba ko imihari yose igwanira mu buseruko bwa DR Congo ishira ibirwanisho hasi
Umunyamabanga mukuru wa ONU António Guterres yavuze ko ababajwe no kubona haciye imyaka myinshi ubutunzi kama bwo mu karere k’ibiyaga binini buguma bwibwa izuba riva.
Yaciye asaba imihari yose igwanira mu buseruko bwa DR Congo gushira ibirwanisho hasi ata kirinze gusabwa, gutyo ngo isubizwe mu buzima busanzwe.
Imwe muri iyo mihari yavuze ko ari Red Tabara, M23, ADF, n’iyindi. Ayagiriza gukora n’ayandi mabi atandukanye.
Guterres yasavye M23 kuva mu burere bwose yigaruriye nk’uko vyumvikanyweko mu biganiro vyabereye muri Angola.
Mu bandi bategetsi bari mu Burundi, harimwo nka Moussa Faki ahagarariye komisiyo y’Ubumwe bwa Afurika (AU/UA), Prezida wa Centrafrique Faustin-Archange Touadéra na Prezida wa Afrika y’Epfo Cyril Ramaphosa.
Intumbero nyamukuru y’iyi nama kwari kugerageza kunagura amasezerano y’amahoro, umutekano n’imigenderanire yerekeye DR Congo n’akarere, amaze imyaka 10 ashizweko umukono, ariko muri iki gihe imihari yitwaje ibirwanisho ikaba igisibije muri ico gihugu.
