Video y’Uburusiya iriko irakwirakwira inyuma y’aho Kremlin ivugiye ko yatewe
Uburusiya buvuga ko bwakoroye drone zibiri zari zitumbereye Kremlin (ikirimba c’umukuru w’igihugu mu Burusiya) i Moscou mw’ijoro ryakeye hanyuma bwagiriza Ukraine kugerageza kugandagura prezida Vladimir Putin.
Amasanamu ya video atarahinyuzwa atembera ku mbuga hwaniro aboneka yerekana ikintu kiguruka hejuru ya Kremlin imbere y’uko giturika.
Ukraine yavuze ko ataho ihuriye n’ico gitero ca drone.
Umuvugizi wa prezida Volodymyr Zelensky yavuze ko Ukraine ishimikiye ku kubohoza ubutaka bwayo kuva Uburusiya buteye mu mwaka uheze.
Uwundi mutegetsi yabwiye BBC ko ico gitero kivugwa ari ikimenyetso c’uko Uburusiya “buriko burategura agasombotso gakomeye k’iterabwoba” muri Ukraine.
Ivyo bihugu birakunda kwagirizanya no guhakana ku bintu biba kuva Uburusiya buteye Ukraine mu mwaka uheze.
Uburusiya bwavuze ko izo drone zarondera kugema Kremlin – inyubakwa ya reta nini cane hagati muri Moscou – zasambuwe n’ubuhinga bwa radar zikoresha imishwarara.
Umuvugi wa Kremlin yavuze ko Putin atari muri Kremlin igihe igitero caba.
Mw’itangazo, ibiro vy’umukuru w’igihugu c’Uburusiya vyavuze biti: “Mw’ijoro ryakeye, reta ya Kyiv yaragerageje kugaba igitero ku kirimba ca Kremlin c’umukuru w’igihugu w’Uburusiya hakoreshejwe ingendeshwa itagira uwuyitwara.’’
Vyavuze ko vyafashe ico “nk’igikorwa c’iterabwoba cari giteguwe kandi nk’ukugerageza kugandagura umukuru w’igihugu”, kandi ko Uburusiya “bugumana uburenganzira bwo gufata ingingo zo kwihora igihe n’umwanya bizoboneka ko bikenewe”.
Putin afise ubwirinzi bwiwe bukomeye cane kandi umwanditsi mukuru wa BBC mu Burusiya Steve Rosenberg avuga ko vyotangaza kwibaza ko drone zoshoboka gushika ahari ho hose hafi ya Kremlin.
Umukuru w’Uburusiya ntaco yabaye kandi gahunda yiwe ibandanya uko bisanzwe, nk’uko ibiro vyiwe vyavuze. Yariko arakorera muri Novo Ogaryovo hanze ya Moscou ku wa gatatu.
Kremlin
Utumanyu twa drone twaguye ku kibanza ca Kremlin ariko nta n’umwe yakomeretse kandi nta nyubakwa zononekaye, nk’uko ibiro vy’umukuru w’igihugu vyavuze.
Vyavuze kandi ko ico gitero cashitse hasigaye iminsi mike ngo habe defire (parade) y’umunsi w’intsinzi y’uwa 9 Rusama (9 May Victory Day) abategetsi bo mu bindi bihugu bari bitezwe kwitabira.
Iyo defire izoba uko vyari bitegekanijwe, nk’uko bivugwa n’amatororokanirizo y’amakuru avuga ko asubiramwo ivyavuzwe na Kremlin
“Ivyanaye i Misocou biragaragara ko bigamije gutuma ibintu vyunyuka imbere y’uwa 9 Rusama,” vyavuzwe n’umuvugizi w’umukuru w’igihugu wa Ukraine Serhiy Nikiforov.
Hagati aho umujenama w’umukuru wa Ukraine Mikhailo Podolyak yavuze ko ivyashitse bishobora gufasha Uburusiya guha insiguro ibitero ku bibanza vy’abanyagihugu basanzwe muri Ukraine kandi bishobora kuba ikimenyetso c’ibikorwa “vy’ibitero vy’utugwi duto duto tw’abagwanya intambara imbere mu Burusiya.
“Hari ikiriko kiraba muri RF [Russian Federation] ariko ata drone za Ukraine hejuru ya Kremlin,” niko Pdolyak yavuze.
Mick Mulroy, yahoze ari icegera c’umushikiranganji ajejwe kwivuna abansi muri Amerika akanaba intwazangabo muri CIA, yabwiye BBC ko hamwe izo nkuru zoba ari zo “bisa n’uko kutoba” kwari ukugerageza kugandagura mu gihe Ukraine ikurikiranira hafi aho Putin aba ari hose kandi akaba atari i Misocou muri uwo mwanya.
“Ibi bishobora kuba kwri ukwereka Abarusiya ko bashobora guterwa ahariho hose kandi ko intambara batanguye muri Ukraine umunwi umwe ishobora kubasanga iwabo mu Burusiya, mbere no ku murwa mukuru,” uko yavuze.
Bitari uko,hamwe bitoba vyagenze uko, “Uburusiya bwoba buriko burakora irementanya kugira burikoreshe nk’icitwazo co kurondera [kwica] prezida Zelensky.
Ibintu bari bamaze kugerageza muri kahise, nk’uko Mulroy yavuze.
Umukuru w’igisagara ca Moscou ku wa gatatu yaciye atangaza ingingo yo kubuza koi hari drone zigururwa hejuru y’igisagara.
Kugurura drone bizosaba uruhusa rudasanzwe rwa reta, nk’uko Sergei Sobyanin yavuze.
Ibisagara vyinshi vy’Uburusiya vyamaze kumenyesha ko bizogabanya ibirori vy’uwa 9 Rusama.
Abategetsi b’Uburusiya bavuze ko ivyo bitewe n’imvo z’umutekano ibitero vy’ingazo zishigikiye Ukraine. Muri aya amayinga yavuye hagiye haba ibuturika n’amasasu mu Burusiya.
