- Umwanditsi, Kalkidan Yibeltal
- Igikorwa, BBC News, Addis Ababa
Intambara zirabandanya kwongerekana mu karere karangwamwo umutekano muke ka Amhara muri Ethiopia hagati y’imigwi y’aho yitwaje ibigwanisho n’igisirikare.
Ababa mu bisagara binini vy’ako karere, umugwa mukuru Bahir Dar n’igisagara kizwi cane ca Gondar, bavuga ko hariko harabera imishamirano ikaze.
Abaharanira agateka ka zina muntu hamwe n’ibimenyeshamakuru bifitaniye ubucuti n’abagwanyi bemeza ko bigaruriye ibice bimwe vy’igisagara ca Baher Dar, ariko bakavuga ko hari abasirikare benshi mu micungararo y’ikibuga c’indege kiri muri ico gisagara hamwe n’imboneshakure y’igihugu.
Ingendo z’indege zo ku bibuga vy’indege vyo muri ako karere, harimwo ica Lalibela, kirimwo amasengero rurangiranwa, zahagaritswe.
Abagwanyi bemeza kandi ko bagenzura ibindi bisagara, harimwo igice kinini ca Debre Birhan, ikigo c’amahinguriro kiri ku birometero 130 mu buraruko bw’umugwa mukuru Addis- Abeba.
BBC ntirashobora kuronka inkuru ata ho zegamiye zivyemeza, ariko abanyagihugu bavuga ko hariko haraba intambara ikaze.
Ku musi w’Imana, uwurongoye ikirindiro cashizweho kugira gikurikirane ishirwa mu ngiro ry’itegeko ry’ibihe bidasanzwe ryemejwe ku musi wa gatanu, uwurongoye iperereza Temesgen Tiruneh, yaremeye ko abagwanyi bari bigaruriye uduce tumwe tumwe, aca ahamagarira abanyagihugu gushigikira igisirikare.
Muri ico gihe nyene, i Addis-Abeba, haravuzwe ifatwa ry’abantu mu mpera z’iyinga.
Abagwanyi bagiriza reta guhiga buhongo abo mu bwoko bw’aba Amhara, bakavuga ko abamaze gufatwa bashika ibihumbi n’ibihumbi.
Imiryango myinshi y’abapfunzwe baragaragaye bakoraniye iruhande y’ishure ryisumbuye, aho bavuga ko ababo bapfungiwe.
Mw’itangazo, umushikiranganji ajejwe kumenyesha amakuru, Legesse Tulu, yaremeje ko hariho abafashwe bafitaniye isano n’iyo ntambara, ariko nta biharuro yatanze.
Mu bantu bapfunzwe harimwo umushingamateka atavuga rumwe na reta, Christian Tadele.
Mu ndwi iheze, mu nyandiko yiwe kuri Facebook, Christian yari yagirije ubutegetsi bw’umushikiranganji wa mbere Abiy Ahmed gutera akarere ka Amhara.
