Imvo n’imvano ku buzima bubandanya buzimba mu Burundi
Mu kiganiro imvo n’imvano c’uyu musi, tuganira ku kibazo c’ubuzima bubandanya kuzimba mu Burundi, aho ibiciro vy’ibintu vya nkenerwa nk’ibifungurwa vyaduze cane ku rugero rutari bwigere rubaho mu Burundi.
Ibiharuro ibanki y’igihugu yasohoye mu ntango y’iyi ndwi vyerekana ko hagati y’ukwezi kwa 12 mu 2021 n’ukwa 12 mu 2022, n’ukuvuga mu kiringo c’umwaka umwe gusa, ibiciro vy’ibifungurwa hamwe n’ibindi bintu vya nkenerwa vyiyongereye ku bice birenga 26 kw’ijana.
Kugira umuntu abitahure neza, dutanze nk’akarorero ku kungene ibintu vyaduze ibiciro, n’ubwa mbere mu Burundi ikilo c’ibiharage gishitse ku 3000. Ni n’ubwa mbere umuceri ushitse ku bihumbi 4500 ku kilo.
Abahinga muvyo ubutunzi bavuga ko vyavuye ku mpamvu zitandukanye. Nko ku bifungurwa, bavuga ko igituma vyaduze ibiciro vyoba vyaturutse kw’ihindagurika ry’ibihe, aho usanga nk’imvura itaguye neza. Ku bindi bintu vya nkenerwa ngo vyavuye ku bintu bitandukanye harimwo ibura ry’amafaranga y’agaciro, igitoro n’intambara iriko irabera mu gihugu ca Ukraine.
Kugira ico kibazo c’ubuzima buzimvye gitorerwe inyishu, hari bamwe basaba ko hafatwa ingingo zikomeye harimwo kugwanya ba kaboko, gusahiriza abanyagihugu muri iki gihe benshi batubitse umukanda mu nda hamwe no gukura amakori ku bintu vya nkenerwa.
N’aho hoba hari ukutavuga rumwe ku vyateye iduga rikabije ry’ibiciro ry’ibintu vya nkenerwa, yaba reta canke amashirahamwe ata ho yegamiye muri politike bose baremeza ko ibintu bitifashe neza. None vyavuye kuki? Kubera iki ibintu vyunyutse mu mwaka wa 2022 gusumba iyindi myaka? Hokorwa iki ngo ibintu bisubire mu buryo?
Ibi ni bimwe mu bibazo tugira duce hirya no hino muri kino kiganiro c’imvo n’imvano mwateguriwe kandi mugiye gushikirizwa na Cyriaque Muhawenayo.
