Gianluigi Buffon: Ingene icamamare ca Cameroun Thomas Nkono yahaye inzira ubuzima bw'umwuga wa rurangiranwa w'Ubutaliano – BBC

N’Kono n’umugwi wiwe wa Lions Indomptables mu gikombe co mu 1982 bari baviriyemwo mu gice c’amajonjora.

Ariko haheze imyaka umunani baronse intsinnzi yabo ya mbere ikomeye muri rimwe mu mahiganwa y’igikombe c’isi akomeye cane, mu kunaniza Maradona agatahira ku busa kuri kimwe ca Cameroun mu rukino rwo kwugurura na Argentine yari isanganywe igikombe, aho hari ku kibuga ca Siro muri Millan.

”Ndemeza ko umugwi wa Cameroun mu gikombe c’isi co mu 1990 uzoguma ufise ikibanza kidasanzwe mu mutima wanje,” Buffon abwira BBC Sport Africa.

”Ndibuka abakinyi bose uko bari 22 kuko, kuri jewe, bari intwari koko”.

N’aho abasatirizi (ba rutahizamu) Roger Milla na Francois Oman-Biyik babaye icitegererezo ku muyabaga Buffon, yabonye ko uko N’Kono yari ateye ari vyo vyari ”agatangaza kurusha”.

”Nararengewe”, nk’uko N’Kono yibuka. ”Kuraba N’Kono mw’igori hari ahantu vyakoze mu mutwe muri jewe bimpa ibakwe ryo kuba umunyegori, kuko, narakunze vyo gupfa ingene yumva uruhara rwo kuba umunyegori.

”Narakunze ingene yigenza n’ingene yava mw’igori akigirwa imbere gutera gusubiza umupira inyuma. Kandi yari afise kumenya bidasanzwe ico akora atarinze kuvyiyumvira.

”Narakunda kwinjiza, bikanezera cane. Ariko rero ico kintu [co kubona N’Kono} carabaye kandi ndashima ko ibintu vyagenze gutyo. Cabaye igihe gihambaye c’imyango yugurutse mu buzima bwanje.”

Umwaka umwe inyuma y’iryo higanwa ry’igikombe c’isi, Buffon yaciye aja mw’ishure mu mugwi Parma wo mu Butariyano aho yaciye ashimikira kuri izo mpano yaheruka kwibonamwo zo gufata mw’igori.

Urukino rwa mbere rwo muri Serie A akinira uwo mugwi rwabaye mu 1995 afise imyaka 17, atuma AC Milan ata gitsindo yinjiza, mu gihe yariko irakinirwa n’umusatirizi yari afise umupira w’inzahabu w’uwo mwaka (Ballon d’Or) akaba yari n’umukinyi mwiza wa Afrika w’umwaka incuro zitatu George Weah.

Buffon ntiyatevye kuba uwo bahitamwo ubwa mbere mu kuja mw’igori muri Parma, mu nyuma yimukira muri Juventus mu 2001.

Mu kiringo ca mbere muri Parma, Buffon yahuye n’umusatirizi wa Cameroun Patrick Mboma yakinira Caliagli imyaka ibiri kuva mu 1998.

Buffon ntiyahanganye mu kuyaga ingene yemera N’Kono, hanyuma N’Kono aca arahuza abo banyegori babiri, bituma Buffon agira urugendo muri Cameroun mu rukino rwo gushimira N’Kono mu 1999.

”Naratangaye numvise ko Gigi Buffon yabaye umunyegori kubera jewe,” uwo ni N’Kono avyemera.

”Namumenye igihe yakina muri Parma, kubera umuvukagiuhugu wanje ‘akaba na murumunanje’ Patrick Mboma.

”Patrick yambariye ko ari we yari agiye kuba umuyegori w’Ubutariyano. Sinari nzi ko yahevye gukina hagati kubera jewe, ariko nibaza ko yahisemwo neza.”