- Umwanditsi, Basillioh Rukanga
- Igikorwa, BBC News
Reta ya Namibia yanse kwongera ikiringo c’uruhusha rwo kwinjira muri ico gihugu (visa) rw’umwami wo muri Uganda ariko arivuriza muri ico gihugu kuva mu kwezi kwa kane.
Umwami Mutebi II wa Buganga ariko aravurwa indwara itamenyeshejwe iyo ariyo. Ibitaro ariko aravurirwamwo vyari vyasavye ko visa yiwe yongerezwa.
Ariko mu nyishu bwatanze, ubushikiranganji bujejwe imigenderanire n’amakungu bwavuze ko itegeko rya Namibia ry’abasohoka n’abinjira ritanga iminsi itarenga 90 ku banyamahanga ku mwaka, yo kuguma muri ico gihugu.
Ibi bishitse mu gihe bivugwa ko abategetsi berekanye ko batanezewe n’ingene habaye imyiyerekano y’abanya-Uganda ku buserukizi bwa Namibia.
”Ndavye amatariki, nifuza kubamenyesha ko ivyo mwasavye vyo kwongererwa ikiringo bitemewe,” niko ikinyamakuru ca reta ya Namibia -NBC cavuze gisubiramwo umutegetsi wo mu bushikiranganji bw’imigenderanire.
Uwuserukira Uganda muri Afrika y’Epfo mu minsi ishize yavuze ko abategetsi ba Namibia batanezerewe n’iburabuzwa ry’bakozi babo bo mu buserukizi ku vyerekeye kuba uwo mwami ari muri ico gihugu.
Mu kwezi kwa Rusama(5) harabaye imyiyerekano ku buserukizi bwa Namibia mu Bwongereza, aho hari abaganda bagiye gusaba ko haba umuco y’iminsi itari mike umwami amaze iminsi myinshi muri ico gihugu.
Bashaka Namibia gushira ahabona amakuru y’aho umwami aherereye kugira hatururuzwe ibihuha vy’uko yoba yaranyurujwe.
Reta ya Namibia ico kibazo yaciye igishikiriza abategetsi b’ubwami bwa Buganda.
Haraheze indwi zibiri, abakuru bo mu bwami bwa Buganda baragiye muri Namibia kurondera ukuri ku magara y’umwami, bitera amakenga mu migenderanire na prezida Yoweri Museveni arabigaya.
”Nsavye abanya-Uganda bose kureka guta mu rudubi mu kwitamwo bagerageza kwerekana ko bitayeho umwami cane,” niko Museveni yavuze.
Izo ntumwa bivugwa ko zagiye ubwami bwa Buganda cane abategetsi ba Uganda batabizi, barahagaritswe gatoya barasambishwa n’abategetsi ba Namibia, bivugwa ko bababajije niba bari bafise uruhusha rwo kubona umwami.
Bagiyeyo n’aho umwami yaheruka gushikiriza ijambo ubwami bwiwe mu butumwa bwa video, aho yavuze ko ariko aratora mitende, yongera avuga ko yizeye gutaha vuba.
Ku wa gatatu, ikinyamakuru co muri Uganda casubiyemwo umutegetsi avuga ko ari ”ibintu bisanzwe bikorwa” ko umunyamahanga ahamaze iminsi 90 asubira mu gihugu ciwe.
”Nta mpari na nkeya ziri muri ivyo,” bivugwa n’umutegetsi wo mu bushikiranganji bw’imigenderanire Erastus Hailwa.
Uganda yavuze ko izokwubahiriza ingingo ya Namibia.
”Namibia yavuze ko itanezwe ubwo buryo bubi bwo kwamamaza igihugu, kandi dutegerezwa kwubaha aho bashize,” bivugwa n’ikinyamakuru co muri Uganda Monitor gisubiramwo ivyavuzwe n’umushikiranganji wa Uganda ajejwe imigenderanire Oryem Okello.
”Dutegerezwa kwubaha amategeko yabo n’imibereho yabo. Kuva umwami (Kabaka) agiye muri Namibia, abantu benshi igihugu bagihinduye isoko binjiramwo uko bashatse,” niko yavuze.
Buganda ni bwo bwami bwa mbere bunini muri bune bwa kera bwo muri Uganda, nta na bumwe bufise ububasha bwa poritike ariko buracafise ijambo mu gihugu.
