Ahavuye isanamu, Getty Images
Gushika ubu, Antony amaze gukinira Manchester United inkino zine muri uno mwaka w’inkino
Brezili yahevye gukinisha umukinyi wo ku ruhande wa Manchester United Antony inyuma y’aho uwahoze ari umukunzi wiwe amwagirije ko yamukubaguye.
Ishirahamwe ry’umupira w’amaguru rya Brezili rivuga ko uno mukinyi w’imyaka 23 yashizwe ku ruhande mu murwi nserukiragihugu inyuma y’aho “ivyemezo bikeneye gukorwako amatohoza bigiriye ahabona”.
Ejo ku wa mbere, ikinyamakuru UOL co muri Brezili cashize ku mugaragaro ibirego vy’uno yahoze ari umukunzi wa Anthony.
Igipolisi muri Sao Paulo n’ico muri Greater Manchester biriko birakora amatohoza kuri ibi birego vyiyamirizwa n’uno mukinyi.
Aciye ku mbuga hwaniro, Anthony avuga ati: “Ndashobora kwemeza ntekanye ko ibi birego ari ibinyoma kandi ko ivyemezo bimaze gutangwa hamwe n’ibindi bizotangwa bizokwerekana ko ndi umwere ku vyo nagirizwa.
“Ndizeye ko amatohoza ariko arakorwa n’igipolisi azoshira ahabona ukuri ko ndi umwere”.
Antony yagirizwa na Gabriela Cavallin yahoze ari umukunzi wiwe ko yamukubise “umutwe” mu cumba c’ihoteri yo muri Manchester ku wa 15 Nzero (1) uno mwaka, aca arakomereka kandi bimusaba kuja kwa muganga.
Avuga kandi ko yakubiswe mu gikiriza, bituma n’igifadikizo c’ibere yari yatewemwo (implant mammaire en silicone/ silicone breast implant) cononekara, bikaba vyamusavye ko akorwa kugira bagikosore.
Mw’itangazo ryiwe ry’ejo ku wa mbere, Antony yongeyeko y’uko imigenderanire yiwe n’uno yahoze ari umukunzi wiwe iri “mu bibazo”, ariko agashimangira ko “atigeze amugirira nabi”.
Ahavuye isanamu, Getty Images
No mu kwa gatandatu yari yasohoye itangazo aho yavuga ko yambitswe inteba ishushe n’umukunzi wiwe yamwagiriza ko yamukubaguye.
Igipolisi co muri Greater Manchester (GMP) kivuga ko “kizi ibi birego kandi ko amatohoza abandanya kugira ngo ivyerekeye aya makuru bimenyekane”.
Congerako kiti: “Nta kindi tuzosubira kuvuga kuri iki kibazo muri iki gihe”.
Igihe igisata ca BBC kijejwe inkino (BBC Sport ) cegera umurwi Manchester United, wavuze ko ataco wari ufise wovuga kuri iki kibazo.
Ibi birego bije inyuma y’aho mu kwezi guheze uno murwi wo mw’ihiganwa ry’Ubwongereza, Premier League, utangarije ko habaye umwumvikano hagati yawo n’umusatirizi Mason Greenwood washitse ku ngingo y’uko yari gusezera inyuma y’amatohoza yamaze amezi atandatu muri uno murwi.
Ivyaha Greenwood yagirizwa, harimwo ugufata ku nguvu n’ihohotera, vyarateshejwe agaciro mu kwa kabiri. Uno mukinyi w’imyaka 21 yatijijwe umurwi Getafe wo muri Espagne, mu ndwi iheze akaba ari ho yinjira icese.
Mu murwi nserukiragihugu wa Brezili, Antony yasubirijwe n’umusatirizi wa Arsenal, Gabriel Jesus, mu nkino zimirije zo kurondera itike y’igikombe c’isi aho izokina na Bolivia na Peru.
